Belçika federal hökuməti, Fələstin Dövlətini tanımaq və İsrailə qarşı sanksiyalar tətbiq etmək barədə qərara gəlib. Bu qərar fövqəladə kabinet iclasında qəbul olunub.
Baş nazirin müavini və xarici işlər naziri Maksim Prevotun sözçüsü Laurens Soenen-in yaydığı açıqlamada, Fələstində, xüsusilə Qəzzada yaşanan humanitar faciəyə və İsrailin beynəlxalq hüquqa zidd hərəkətlərinə diqqət çəkilib.
Belçikanın humanitar yardımı prioritet tutmağa davam edəcəyi, Xarici İşlər və Müdafiə Nazirliklərinin Qəzzadakı vəziyyəti yaxşılaşdırmaq üçün iş apardığı bildirilib. Bu il üçün əvvəlcədən ayrılan 7 milyon avroya əlavə olaraq 12,5 milyon avro da yardıma yönəldilib. Üstəlik, Ümumdünya Səhiyyə Təşkilatının tələbi ilə bölgədəki ağır xəstə uşaqların tibbi təxliyəsinin gücləndiriləcəyi qeyd olunub.
Şiddət yanlısı yəhudi məskunçular və Həmas üzvlərinə qarşı milli səviyyədə sanksiyalar hazırlanacağı, maliyyə məhdudiyyəti, əmlakın dondurulması və ölkəyə giriş qadağası kimi tədbirlərin görüləcəyi vurğulanıb. İsrailin aşırı sağçı nazirləri İtamar Ben-Qvir və Bezalel Smotriç, həmçinin Həmas rəhbərlərinin Belçikaya girişinə qadağa qoyulub və Şengen bölgəsində vizələrinin dayandırılması üçün addımlar atılıb.
2009-cu ildən mövcud olan qərarın genişləndirilməsi ilə İsrailə bütün silah ixracı və tranzitinin qadağan ediləcəyi, həm hərbi, həm də mülki təyinatlı məhsulların bu çərçivəyə daxil ediləcəyi bildirilib. Həmçinin, İsrailin işğal altındakı torpaqlarda istehsal etdiyi malların Belçikaya idxalı yasaqlanacaq.
Belçika hava məkanını İsrailin hərbi uçuşlarına bağlayıb. Müdafiə Nazirliyi İsraildən alınan hərbi avadanlıq və xidmətlərin alternativlərini araşdıracaq.
Avropa səviyyəsində isə Belçika, İsraillə ticarət, tədqiqat və texnologiya sahəsində əməkdaşlıq sazişlərinin dayandırılması yönündə səs verəcək. Avropa Yatırım Bankı, Avropa Yatırım Fondu və Europol ilə əməkdaşlıq məsələləri də yenidən nəzərdən keçiriləcək.
Belçika, həmişə iki dövlətli həllin tərəfdarı olduğunu vurğulayaraq, BMT Baş Assambleyası çərçivəsində Fransa və Səudiyyə Ərəbistanının təşəbbüsü ilə Fələstini tanıyacağını açıqlayıb. Bu tanımanın, Həmasın idarəetmədən uzaqlaşdırılması və bütün əsirlərin azad olunmasından sonra rəsmiləşdiriləcəyi qeyd olunub.
BMT himayəsində humanitar dəhlizlərin təmin olunması, Fələstində dövlət quruculuğu və demokratik institutların dəstəklənməsi üçün texniki yardım veriləcəyi, xüsusi inkişaf proqramı həyata keçiriləcəyi bildirilib. UNRWA-ya maliyyə dəstəyi davam edəcək, Fələstinin BVF və Dünya Bankına tam üzvlüyü üçün təşəbbüslər göstəriləcək.
Fələstin Xarici İşlər Nazirliyi, Belçikanın bu ay BMT Baş Assambleyasında Fələstini tanımaq niyyətini məmnuniyyətlə qarşıladığını açıqlayıb və digər ölkələri də oxşar addım atmağa çağırıb. Nazirlik bu qərarı beynəlxalq hüquqa və BMT qətnamələrinə uyğun, iki dövlətli həlli qoruyan və sülhə töhfə verən bir addım kimi qiymətləndirib.
