ABŞ və İsrail mərkəzli hücum və daxili qarışıqlıq cəhdlərinə qarşı İstanbulda İran İslam Respublikasının Baş Konsulluğu qarşısında keçirilən aksiya zamanı qlobal müqavimət vurğusu ön plana çıxıb; Fələstindən Latın Amerikasına uzanan anti-imperialist mübarizəyə dəstək mesajları verilib.
ABŞ və İsrail qaynaqlı təhdidlərə və daxili sabitliyi pozma cəhdlərinə qarşı İstanbulda kütləvi həmrəylik aksiyası təşkil olunub. İranın İstanbul Baş Konsulluğu önündə keçirilən etirazda İrandakı son proseslərə, Fələstin müqavimətinə və qlobal müqavimət cəbhəsinə güclü vurğu edilib.
Qlobal Müqavimət Platformasının çağırışı ilə keçirilən aksiyada çıxış edənlər, İranda son dövrdə baş verən hadisələrin “xalq hərəkatı” kimi təqdim edilsə də, əslində ABŞ və İsrail dəstəkli, ölkəni sabitlikdən çıxarmağı hədəfləyən terror və sabotaj prosesi olduğunu bildiriblər. Bu cəhdlərin 1979 İslam İnqilabından bəri İrana qarşı aparılan çoxşaxəli hücumların davamı olduğu vurğulanıb.
Aksiya boyunca “Həmas-a salam, müqavimətə davam”, “Vur vur, inləsin, Vaşinqton dinləsin”, “Amerikaya ölüm, İsrailə ölüm”, “Qəhr olsun Pəhləvi”, “Qəhr olsun Amerika imperializmi”, “Qəhr olsun Amerika, qəhr olsun İsrail”, “İran–Türkiyə çiyin-çiyinə”, “İnqilabi İran qürurumuzdur” şüarları səsləndirilib.
İştirakçılar “Qəzza müqaviməti qürurumuzdur”, “İsrail dövlət deyil, terrorçudur”, “Müsəlmanlar qardaşdır”, “ABŞ quldurluğuna qarşı İranın yanındayıq” yazılı plakat və lövhələr daşıyıblar. Meydanda İran, Fələstin və Türkiyə bayraqları ilə yanaşı, Həmas, Hizbullah və İslami Cihad bayraqları da yer alıb. Aksiyaya İstanbuldan kənardan gələnlərin də qatıldığı bildirilib.
“İradəli müqavimət qarşısında ABŞ diz çökür”
Aksiyada Əhli-Beyt Alimləri Dərnəyinin sədri Kadir Akaras da çıxış edib. Çıxışına Qurani-Kərimdən bir ayə ilə başlayan Akaras bildirib ki, ABŞ və sionist dairələr nə edirsə etsin, qalib tərəf haqq cəbhəsi, müqavimət cəbhəsi və Qurana iman edənlər olacaq.
Akaras Amerikanın gücünün qarşı tərəflərin iradəsizliyindən qaynaqlandığını, iradəli müqavimət qarşısında isə ABŞ-nin diz çökməyə məcbur qaldığını qeyd edib. Türkiyənin İrana verdiyi dəstəyin ümidverici olduğunu vurğulayan Akaras İran, Venesuela, Kuba, Yəmən və bütün müqavimət cəbhələrinə salam göndərib. Müsəlmanların birliyinin pozula bilməyəcəyini, ABŞ və İsrailin isə gec-tez sona yaxınlaşacağını deyib.
Qlobal müqavimət çağırışı
Kadir Akarasın çıxışından sonra aksiyanın mətbuat açıqlaması oxunub. Açıqlamada Amerika imperializmi və qlobal sionizmin onilliklərdir bölgəyə müharibə, çevriliş, qətliam və dağıntı gətirdiyi, bu hücumların bu gün mərkəzində İran İslam Respublikasının dayandığı bildirilib.
Hədəfin inqilabi İslam Respublikasını devirmək və yerinə imperializmə bağlı bir rejim qurmaq olduğu vurğulanıb. “Böyük İsrail” layihəsi və sionist ekspansionizmin təkcə İranı deyil, Türkiyəni və bütün bölgəni təhdid etdiyi qeyd edilib. Buna görə qlobal müqavimət məsuliyyəti ilə hərəkət edildiyi bildirilib.
Fələstin müqaviməti ilə həmrəyliyin altı cızılaraq, İran İslam Respublikası və digər anti-imperialist ölkələrlə qurulan əlaqənin eyni mübarizə xəttinin bir parçası olduğu ifadə edilib. Xüsusilə Venesuela və Kuba başda olmaqla Latın Amerikasında ABŞ-yə qarşı dirənən xalqlara salam göndərilib. Açıqlamada həmçinin Türkiyədə, xüsusən Kürecik və İncirlikdə yerləşən ABŞ bazalarının bağlanması, İsraillə hər cür əlaqənin kəsilməsi çağırışı yenidən səsləndirilib. Mətn “Ümmətik, qardaşıq; dirənəcəyik və qazanacağıq” vurğusu ilə yekunlaşıb.
Tramp və Netanyahu maketləri yandırıldı
Mətbuat açıqlamasından sonra aksiyanın sonunda Donald Tramp və Benyamin Netanyahunun maketləri ilə birlikdə ABŞ və İsrail bayraqları yandırılıb. Bu etirazla iştirakçılar imperializmə və sionizmə qarşı mövqelərini simvolik şəkildə nümayiş etdiriblər.
Aksiya edilən dualar və müqavimət ruhlu şüarlardan sonra insidentsiz şəkildə başa çatıb.
