Epşteyn sənədləri qəfil əlçatmaz olub
ABŞ mətbuatında yayılan məlumata görə, Cinsi cinayətlərdə ittiham olunmuş Ceffri Epşteynə aid ən azı 16 sənəd ABŞ Ədliyyə Nazirliyinin ictimai səhifəsindən silinib. Associated Press agentliyinin xəbərində bildirilir ki, yoxa çıxan materiallar arasında ABŞ Prezidenti Donald Trampın da yer aldığı bir fotoşəkil olub.
Hadisə sənədlərin dərc edilməsindən bir sutkadan az müddət sonra baş verib. Maraqlıdır ki, sənədlərin silinməsi ilə bağlı nə rəsmi açıqlama verilib, nə də ictimaiyyət əvvəlcədən məlumatlandırılıb.
Trampın yer aldığı foto da silinənlər arasındadır
Associated Press-in məlumatına əsasən, cümə günü ictimaiyyət üçün açıq olan, lakin şənbə günü artıq əlçatan olmayan sənədlər arasında çılpaq qadın təsvirlərinin yer aldığı rəsmlərin fotoları da olub. Sənədlərdən birində kitab rəfi və çekmecələrdə yerləşdirilmiş fotoşəkillər əks olunub.
Həmin fotolardan birində çekmecənin içində digər şəkillərlə yanaşı Donald Trampın Ceffri Epşteyn, Melaniya Tramp və Epşteynin uzunmüddətli tərəfdaşı Gislayn Maksuellə birgə görüntüləndiyi foto yer alıb. Məhz bu şəkil ictimai diqqəti daha da artırıb.
Ədliyyə Nazirliyi suallara cavab verməyib
ABŞ Ədliyyə Nazirliyi şənbə günü yerli vaxtla sənədlərin niyə yoxa çıxması ilə bağlı jurnalistlərin suallarını cavabsız qoyub. Nazirlik yalnız X sosial şəbəkəsində paylaşım edərək bildirib ki, fotoşəkillər və digər materiallar “qanuna uyğun və yüksək ehtiyatla” araşdırılıb redaktə olunmağa davam edəcək, əlavə məlumatlar toplanır.
Bu açıqlama isə sənədlərin niyə əvvəlcədən xəbərdarlıq edilmədən silindiyinə aydınlıq gətirməyib.
Şübhələr və siyasi reaksiyalar artır
Sənədlərin yoxa çıxması Epşteyn işi ətrafında yeni spekulyasiyalara yol açıb. Xüsusilə nələrin silindiyi və bunun hansı səbəblərlə edildiyi ilə bağlı suallar ictimaiyyətdə və siyasi dairələrdə narahatlıq doğurub.
Nümayəndələr Palatasının Nəzarət Komitəsində təmsil olunan demokratlar X-də paylaşım edərək Trampın yer aldığı fotoya işarə edib və belə bir sual ünvanlayıblar: “Başqa nə gizlədilib? Amerika ictimaiyyəti şəffaflığa ehtiyac duyur”.
Əsas materialların da itkin düşdüyü bildirilir
Məlumata görə, yayımlanan on minlərlə səhifə Epşteynin cinayətləri və ya ona illərlə federal ittihamlardan yayınmağa imkan verən prokurorluq qərarları ilə bağlı ciddi yeni məlumatlar təqdim etməyib. Əksinə, ən mühüm sənədlərin bir qisminin dərc olunmadığı və ya sonradan silindiyi iddia olunur.
Xüsusilə FTB-nin qurbanlarla apardığı müsahibələr və ABŞ Ədliyyə Nazirliyinin ittiham qərarlarına dair daxili qeydlərinin itkin düşməsi diqqət çəkir. Bu sənədlər istintaqın Epşteyn işinə necə yanaşdığını və onun 2008-ci ildə yalnız nisbətən yüngül ştat səviyyəli fahişəlik ittihamını qəbul etməsinə niyə imkan verildiyini izah edə biləcək əsas materiallar hesab olunurdu.
