Səkkiz ölkədən birgə diplomatik bəyanat
Misir, İordaniya, Səudiyyə Ərəbistanı, Qətər, BƏƏ, Türkiyə, İndoneziya və Pakistanın xarici işlər nazirləri sionist rejimin Qüdsdə yerləşən Əl-Əqsa məscidini ibadətçilər üçün bağlamasını pisləyən birgə bəyanat yayıb.
Nazirlər bildiriblər ki, xüsusilə Ramazan ayı ərzində məscidin bağlanması və ibadətçilərin girişinə qoyulan məhdudiyyətlər beynəlxalq hüququn və Qüdsün mövcud tarixi-hüquqi statusunun pozulması hesab olunur.
İbadət azadlığının pozulması
Birgə bəyanatda qeyd olunub ki, Qüdsün Köhnə Şəhərinə və ibadət məkanlarına girişə tətbiq olunan təhlükəsizlik məhdudiyyətləri ciddi hüquq pozuntusudur.
Nazirlərin fikrincə, bu tədbirlər ibadət azadlığı prinsipinə ziddir və dini məkanlara sərbəst çıxış hüququnu məhdudlaşdırır.
“Qüdsdə İsrailin suverenliyi yoxdur”
Bəyanatda İsrailin Qüds və onun dini məkanları üzərində suverenliyinin tanınmadığı da vurğulanıb. Nazirlər bildiriblər ki, şəhərin müsəlman və xristian müqəddəs yerlərinin statusu beynəlxalq hüquqla qorunur.
Sənəddə İsrailin məscid daxilində və ibadətçilərə qarşı həyata keçirdiyi bəzi addımlar “təxribat xarakterli” addımlar kimi qiymətləndirilib.
Əl-Əqsa məscidinin statusu
Bəyanata görə, təxminən 144 dönüm sahəni əhatə edən Əl-Əqsa məscidi tam şəkildə müsəlmanlara məxsus ibadət məkanıdır.
Nazirlər qeyd ediblər ki, məscidin idarə olunması və giriş qaydalarının tənzimlənməsi İordaniyanın Vəqflər və İslam Müqəddəsləri Nazirliyinə bağlı Qüds Vəqflər İdarəsinin səlahiyyətinə daxildir.
İsrailə çağırış
Səkkiz ölkənin xarici işlər nazirləri İsraili Əl-Əqsa məscidinin qapılarını dərhal açmağa və Qüdsün Köhnə Şəhərinə giriş məhdudiyyətlərini aradan qaldırmağa çağırıblar.
Onlar həmçinin ibadətçilərin müqəddəs məscidə sərbəst şəkildə daxil olmasına mane olmamağı tələb ediblər.
Beynəlxalq ictimaiyyətə müraciət
Bəyanatda beynəlxalq ictimaiyyətə də çağırış yer alıb. Nazirlər dünya dövlətlərini Qüdsdə müsəlman və xristian müqəddəs yerlərinə qarşı davam edən pozuntuların qarşısını almaq üçün qəti mövqe tutmağa çağırıblar.
Sənəddə həmçinin müqəddəs məkanların toxunulmazlığının qorunması və ibadət azadlığının təmin edilməsinin vacibliyi vurğulanıb.
