Borneo çayında dəhşətli anlar: Piton bələdçiyə hücum etdi
Endoneziyanın Borneo adasında turistlər üçün təşkil olunan bir çay turu faciə ilə nəticələnə bilərdi. Təxminən 6 metr uzunluğunda nəhəng piton, bələdçi Heruya hücum edərək onu saniyələr içində suya çəkib və boynuna dolanıb.
Hadisə zamanı Heru, çayın kənarında hərəkətsiz dayanan pitonu görərək onun baş hissəsindən tutmağa çalışıb. Lakin yırtıcı ildırım sürəti ilə hərəkət edərək bələdçini suya sürükləyib və bədəninə dolanmağa başlayıb.
Qorxulu anlar kameraya düşdü
Sosial mediada yayılan videoda Herunun sudan çıxmağa çalışdığı, lakin pitonun qalın bədəni ilə onu sıxaraq boğmağa cəhd etdiyi açıq görünür. Hadisəni izləyən ekipaj üzvləri əvvəlcə şok yaşasa da, dərhal müdaxilə edərək ilanı bələdçinin boynundan güclə ayırıblar.
İki nəfərin eyni anda pitonun başı və quyruğunu tutaraq onu açmağa çalışdığı, bir neçə saniyəlik gərginliyin ardından Herunun azad edildiyi bildirilib.
Nəticədə piton zərər vermədən tutulub, fotoqraflandıqdan sonra təbiətə geri buraxılıb.
“Bu, gördüyümüz ən güclü piton idi”
Hadisə anlarını lentə alan şahid Mohamed Alisa açıqlamasında bildirib:
“Bu, indiyədək qarşılaşdığımız ən böyük və ən güclü pitonlardan biri idi. Bizim prinsipimiz heyvanlara zərər verməməkdir.”
Tur rəhbəri Herunun hadisədən heç bir xəsarət almadan xilas olduğu təsdiqlənib.
Dünyanın ən uzun ilan növü
Borneo adasında yaşayan retikulyasiya olunmuş pitonlar (Malay pitonu) dünyanın ən uzun ilan növü hesab olunur. Bu növ 6 metrdən çox uzana bilir və zəhərsiz olsa da, qurbanını sıxaraq boğur.
Mütəxəssislər bildirirlər ki, bu pitonlar adətən insanlara hücum etmir, lakin özlərini təhdid altında hiss etdikdə müdafiə refleksi ilə hücum edə bilirlər.
Hadisə bölgədə vəhşi təbiət turlarının təhlükəsizlik qaydalarının gücləndirilməsi zərurətini yenidən gündəmə gətirib.
