Ölümə səbəb olan qəza, nəticəsiz qalan cəza
Novxanı–Sumqayıt avtomobil yolunda baş vermiş və 4 nəfərin faciəvi ölümü ilə nəticələnmiş ağır yol-nəqliyyat hadisəsi üzrə məhkum edilmiş iş adamı Elşad Kəlbəliyev cəzadan azad olunub. Son qəbul edilən amnistiya aktının ona da şamil edilməsi nəticəsində Kəlbəliyev azadlığa buraxılıb.
Bu qərar ictimaiyyət arasında haqlı suallar doğurub. Sərxoş vəziyyətdə sükan arxasına keçən, nəticədə dörd nəfərin həyatına son qoyan şəxsin real həbs cəzası çəkmədən azadlığa çıxması hüquq sisteminin ədalət prinsipləri ilə bağlı ciddi müzakirələrə yol açıb.
Dörd insanın həyatı yarımçıq qaldı
Hadisə 2021-ci ilin iyun ayında baş verib. Elşad Kəlbəliyevin idarə etdiyi “Range Rover” markalı avtomobil Murad Ziyadovun sükan arxasında olduğu “Daewoo Damas” markalı nəqliyyat vasitəsi ilə toqquşub. Qəzanın təsiri o qədər ağır olub ki, qarşı tərəfdə olan avtomobildəki bütün şəxslər həyatlarını itiriblər.
Qəza nəticəsində sürücü Murad Ziyadov, Bakı şəhər sakinləri Kamran Əhmədov və Ülman Şıxəliyev, eləcə də Tovuz rayon sakini Yunis Əhmədov dünyasını dəyişib. Bu insanlar sadəcə bir anlıq məsuliyyətsizlik və laqeydliyin qurbanı olublar.
Sərxoşluq faktı və hüquqi barışıq
İstintaq zamanı müəyyən edilib ki, Elşad Kəlbəliyev qəza baş verən zaman sərxoş vəziyyətdə olub. Bu fakt normal hüquqi praktikada cəzanı ağırlaşdıran hal hesab edilsə də, nəticə gözlənildiyi kimi olmayıb.
Sonrakı mərhələdə ölən şəxslərin hüquqi varislərinin Kəlbəliyevlə barışması işi fərqli istiqamətə yönəldib. Maddi kompensasiyanın insan həyatını əvəz edə bilməyəcəyi fikri cəmiyyətdə geniş şəkildə səslənsə də, bu barışıq son nəticədə cəzanın yüngülləşməsinə və ardınca amnistiya ilə azadlığa çıxmasına zəmin yaradıb.
Cəmiyyətdə ikili standart ittihamları
Elşad Kəlbəliyevin tanınmış tikinti maqnatı Məhərrəm Novruzovun kürəkəni olması da diqqətdən yayınmayıb. Hadisə ilə bağlı ictimai müzakirələrdə tez-tez “sadə vətəndaş olsaydı, eyni qərar verilərdimi?” sualı səsləndirilir.
Dörd nəfərin ölümü ilə nəticələnən cinayətin faktiki olaraq cəzasız qalması cəmiyyətdə hüquqi bərabərlik prinsipinə inamı sarsıdan nümunələrdən biri kimi qiymətləndirilir.
