İstanbulda beynəlxalq konfrans
İstanbulda keçirilən “Soyqırımdan Fələstin Dövlətinin İnşasına” adlı beynəlxalq konfransda bir sıra ölkələrdən – Fələstin, Türkiyə, İran, Misir, Səudiyyə Ərəbistanı, Rusiya, Almaniya, Fransa, İngiltərə, Norveç və Danimarkadan mütəxəssislər iştirak edib. Tədbirdə çıxış edən Almaniya Bundestaqının keçmiş üzvü Zaklin Nastiç, Berlin hökumətini sərt tənqid edib.
“Bir daha əsla” andı pozuldu
Nastiç bildirib ki, Almaniya hökuməti İsrailə silah tədarükü və siyasi dəstəklə Qəzzədə törədilən soyqırıma açıq şəkildə ortaq olur:
“Almaniya Auşvitsdən sonra ‘Bir daha əsla’ deyə and içmişdi. Amma bu gün biz görürük ki, bu and pozulub, hətta xəyanət edilib. Qəzzədə 62 mindən çox insan öldürülüb, minlərlə qadın və uşaq həyatını itirib. Almaniya isə İsrailə milyardlarla avroluq silah göndərməklə bu cinayətlərin ortaq tərəfinə çevrilib.”
“Tənqid susdurulur”
Sabiq deputatın sözlərinə görə, Almaniyada İsrail siyasətinə qarşı çıxanlar dərhal “antisemit” damğası ilə üzləşir, media və ictimaiyyət üzərində güclü senzura tətbiq olunur. O qeyd edib ki, fələstinli jurnalistlər iş yerlərini itirir, aksiyalar qadağan olunur, sosial şəbəkələrdə Fələstini müdafiə edən səs və paylaşımlar silinir.
“İnsan haqları pozulur”
Nastiç vurğulayıb ki, Almaniyanın İsrailə qeyd-şərtsiz dəstəyi ölkənin öz tarixi və konstitusiyası ilə ziddiyyət təşkil edir:
“Əgər ‘bir daha əsla’ yalnız yəhudilər üçün keçərlidirsə, fələstinlilər üçün yoxdursa, bu, dəyərlərin istismarıdır. Almaniya hökuməti Qəzzədə müharibəni dəstəkləməklə beynəlxalq hüquqa zidd hərəkət edir və özünü soyqırımda şərik edir.”
Çağırışlar
Nastiç çıxışında Almaniyanın İsrailə silah göndərilməsini dərhal dayandırmalı, Fələstini müstəqil dövlət kimi tanımalı və beynəlxalq məhkəmə orqanlarının araşdırmalarını dəstəkləməli olduğunu vurğulayıb.
